屋村中的夢工房

今日俾C小姐叫咗出去食飯(原本都帶咗飯), 諗住食M記, 當我地出車時, 我話突然間好想食壽司吖~不過一係要去海趣坊(都幾貴!)一係就去市中心, 元X等, 最後都係維持原判去食M記, 去咗蝴蝶村, 因為個殊係商場消費滿五十蚊可免費泊一個鐘, 都係我地最近常去既熱門地方~當我地行去M記時, 一路睇下啲商鋪, 居然俾我地發現有間食日本野既鋪頭 ─ 夢工房。
我地係門口睇下啲食物價錢, 感覺都唔係好貴, 最後用猜情尋既方法決定咗食日本野, 入面都幾多位, 去既時間仲算早所以人都未算最多, 佢係行迴轉壽司形式, 我地都有望下有無咩好食, 但因為第一次所以都唔敢食咁多, 最後都係揀咗午餐, 我要咗個剌身壽司拼盤($ 36), C小姐要咗份四色刺身飯($ 42), 一個餐有麵鼓湯同免費熱飲, 價錢都算OK, 比起海趣坊沖繩日本料理動輒四五十蚊起, 當然算便宜囉~壽司都比想像中好食, 唔好睇我個份好少咁, 都好飽架~C小姐個份有好多剌身, 啲刺身都幾厚身, 上面係剌身下面係醋飯, 飯都有兩大碗, C小姐食埋啲剌身, 啲飯都係食到三份之一咋~附餐既麵鼓湯好好, 好夠味, 仲有海帶同豆腐, 比沖繩有味得多, 熱飲就一般, 我既奶茶無驚喜, 反而C小姐杯熱檸茶就有驚嚇啦, 杯面度有層唔知係油定係咩既物體, 最後都無飲到~
兩個人埋單$78, 無加一, 算抵掛?
迴轉壽司↓

剌身壽司拼盤($ 36) ↓

四色刺身飯($ 42) ↓

之後見停車場未夠鐘就去咗山崎買芝士波波同hotcake做今日既下午茶同聽朝早餐~hehe~

話咁快就放咗四日復活節假期啦~

四日復活節假又過咗去啦, 又要返工啦~
放假第一天, 瞓到十二點至起身, 足足瞓咗十二個鐘, 好滿足吖~跟住就係上網打nds, 咁就過完第一日~
放假第二天, 瞓到九點幾就醒咗啦, 總算同平時放假時既起身時間差唔多~不過呢一日都係懶懶行, 上網、研究新玩具、打nds, 又係一個頽廢既懶人生活~
放假第三天, 瞓到九點幾就醒, 無無聊聊上下網, 下晝兩點幾出街入元朗, 因為約咗JCCC同學會既老同學到河馬外父屋企BB蕉, 三點半咁早入去係幫手買野吖, 不過我都係睇同拎, 因為我都唔識買野既, 反而河馬呢個煮夫就好鬼熟手~我仲同河馬太講, 你真係幸福, 有個咁能幹既家庭煮夫(本業係消防員)~跟住等齊人就去目的地啦, 原來河馬外父屋企都幾入, 同我上次去摘士多啤梨係同一條路, 不過佢仲入, 幾乎去到公痷路尾, 跟住仲要轉入一個支路口再左轉右轉咗一大段路至到, 老實講, 真係認唔到架, 我諗GPS都未必搵到呢個位置~上到係有一個個空地, 有好多隻狗吖, 不過最得意係一隻狗BB, 好鬼Q, 雖然係唐狗, 但有啲似尋回犬既BB, 最好笑係佢好鍾意咬人褲腳, 我地大人當然唔會咁易比佢咬啦, 不過河馬仔浩臻就慘囉, 成日俾佢咬吖~跟住大家坐係殊吹下風, 等開始, 到咗五點幾其他人都到, 河馬亦搭好咗個爐, 無錯, 真係搭爐架, 係用啲磚一層一層咁搭上去, 如果係我就唔會咁好心機囉, 一定買外面既燒烤爐就算囉~

除咗一啲現成既醃制食物, 河馬仲醃咗蒜茸雞翼、豬扒及佢新發明既泰式酸辣雞翼, 因為我個人比較懶既關係, 所以即場試過燒雞翼, 但後尾拎咗啲返屋企, 第二日焗黎食仲好正喎~GOOD吖~
玩到八點幾因為其中一個同學要出番元朗, 咁我地都咁車出去囉, 臨走前河馬同河馬太仲燒咗一啲野食拎番去俾媽媽試下佢啲手勢, 所以成為咗尋晚既晚餐一部份~我仲約好咗佢地, 叫佢地冬天黎我屋企打邊爐, 等我招呼返佢地~
唔知係未個日飲得太多茶既關係(一樽大津路烏龍茶&一樽500ML道地極品烏龍茶), 居然失眠吖, 眼光光典到三、四點至瞓得著吖, 慘~
放假最後一天, 原本預訂同媽媽入流浮山行下, 因為好多年都無入過去啦, 但朝早十點幾(其實個陣時至瞓得最諗)媽媽話青姨打黎問我地返唔返深圳灣行下, 原本興趣不大架, 因為想瞓覺吖, 不過如果我唔去媽媽又話唔去, 所以一定要做陪客~十一點幾上到去, 去咗南山郵局既春滿園飲茶, 因為尋日唔係中國假期既關係, 上面無咩人行, 條街都好少人咋, 不過去到酒樓仲要等位, 見到間酒樓有好多海鮮吖~上到去由姨丈一家發板, 食物水準真係唔錯, 四個大人兩個細路都係180左右, 今次堅持由我地請客, 因為每次上去食飯都姨丈請, 自己個心唔係咁安樂架~
食完行番去沃爾瑪, 中途去咗一個商場, 入面既超市好靚架, 不過貨物就比較少囉, 所以我都無買到野, 之後去到沃爾瑪, 買咗三大盒濃湯寶, 仲有咖啡, 另外買咗香蕉百力枝同抺茶慕絲百力枝, 最特別係買咗美極即沖湯, 以次香港都好興架, 不過宜家都好難搵到囉, 所以買咗幾包番香港, 尋晚即刻整咗酸辣湯, 2.8一包湯粉, 都唔會要求高, 不過拎黎煮烏冬都唔錯架~
就係咁, 唔經唔覺就放咗四日假, 黎緊五月又連續放三日啦~正吖~

復活節假期又來啦~~

又係連續四日既復活節假期啦, 又可以每日係屋企, 瞓到飽~
暫時未諗到有咩活動, 或者來個深圳灣一日遊?星期日約咗JCCC同學會BBQ, 但呢幾日異常熱氣, 不過都要去架啦, 因為上次團拜已經甩底, 今次冒住生痘痘, 飛滋都要去~
買咗聖安娜專登為復活節設計既蛋糕, 上面係朱古力蛋糕, 入面有三粒麥提莎同棉花糖, 下面係草苺啫喱加慕絲~上次情人節出無買到, 因為一向覺得聖安娜啲西餅一般, 但今次見網上都好多人讚喎, 就買咗黎試下, $38 一對, 都幾貴下架, 但偶然一次, 無計啦!(用咗nokia 5800影相, 效果真係唔錯噃~~)

新玩具 - Nokia 5800

同事早前換了一部新電話 - Nokia 5800, 此機一出時真的很多人談論, 但自己對touch mon一向興趣不大, 亦未諗過要換, 但因為同事換了機而有機會試玩, 又好似幾好喎, 最後忍唔住拎咗自己部N81去trade in~

上星期五趁食晏時間走咗去市中心換機, 其實換nokia 5800既原因係因為佢睇片真係好得, 我自己成日dl咗啲日本綜藝節目但無時間睇, 換咗機就可以搭車時睇啦~同埋佢既電子書模式雖然唔係nokia本身既(nokia未開發5800既電子書程式), 但係網上搵到既仲好用~~

總括黎講, 雖然換既時候有啲衝動, 但都無後悔既~

9/4 updated ~ 一個site office有三個人用n5800, 勁吖~