公司聖誕party

近兩年我地自己site都無攪任何聖誕party, 都係出去LCK同大家姐個SITE既同事一齊慶祝!
不過今年特別啲既係因為九巴老細今年買咗新屋，所以佢BOOK咗新屋既Club house 等我地一班同事可以BB蕉。
既然有份食當然就要出番一份力啦，所以我地就幫手買BB蕉食物，燒烤前一日去咗美樂一間開咗好耐既燒烤店買野食，原本都唔知好唔好食架，不過佢可以係蝴蝶灣開業咁耐，應該都OK既!!幸好啲同事們食完都話啲食物醃得好好味!
BB蕉個日真係好頻臨吖，等埋C小姐返公司就同埋J先生一齊出咗去吉之島買野，因為C小姐同J先生都唔係咁熟路，所以就由我呢枝盲公竹帶路囉!發覺一早去吉之島超市真係好好行，因為平時都好多人，所以都無咩心機行，但一早既吉之島無咩客人，我地可以慢慢揀，仲比預訂既買多咗好多野吖!!買咗四百幾蚊野~~因為吉之島買滿四百幾蚊有兩小時免費泊車，去俾停車場時個小姐仲好好人話我地只係泊咗一個鐘，問我地想唔想再行下?一來要買既野已經買咗，二來要趕住返公司吖!返到公司已經十點半，再執埋啲手尾十一點鐘就出發去LCK囉~~
中途去咗三聖買海鮮，我地由最尾個檔開始行，行到去最頭第二間，發現最頭既鋪頭居然平過最入既鋪頭，原本只係想買兩斤中蝦，但見佢啲花蛤好靚咁，係有餘錢之下我地又買咗三斤花蛤，個老闆娘好鬼好傾!!
買齊野就揸車出去LCK囉，我地行三號幹線出去，我都係第一次揸車去遠過荃灣既地方，所以三號幹線唔係好熟路，就係咁心急之下入錯咗路口又上錯路口，最後去咗尖沙咀出口，跟住發現我地迷路囉~~好彩我前晚係屋企搵番以前買落既駕駛地圖，雖然行錯幾個路口，但最後都搵到路去老細屋企，如果唔係行錯路，我諗我地廿分鐘就可以到達~最後用咗35分鐘!!
好彩LCK都有準備食物，如果唔係淨係等我地個啲，就餓慘囉!!
老細新居花園真係好大好靚，BB蕉場地係一個大帳篷同埋一個鐵板式既燒烤爐，好多同事都到咗,仲認識咗南丫島既阿YING，佢對眼好大吖!!
今次燒野食好豐富吖，有新鮮蝦、花蛤、帶子、三文魚同其他肉食，大家都玩得好開心~~玩到三點幾會場夠鐘我地就返歸囉~~
首先車咗C小姐去TW，然後再車大家姐返屏山放低行李，返屏山行大欖隧道，又係第一次行咋，無咩車，好暢通!等大家姐放低咗行李我地就原車揸返去TM18暫泊，好好彩係去到TM18有同事車番我同大家姐去吉之島搭車(由TM18行去輕鐵站都幾遠)，架黃車就留係TM18等我放完假星期一至接番佢走囉!
估唔到一日行咗咁多自己未行過既路，雖然好驚但又覺得咁樣可以多啲駕駛經驗!
今次真係玩得好開心吖!當然最開心係今個聖誕節我要清假既關係，可以連放四日!!
最後，祝大家
Merry Christmas & Happy New Year!!