吹水篇~~

哈哈~已經諗唔到可以用咩標題啦, 所以用吹水篇黎做標題, 簡單易見, 純粹老吹~~
星期六晚約咗幾位同事到旺角東大門自助燒烤, 因為返半日既關係, 所以我又返咗屋企先, 始終出去玩樂前都要服侍下家中老犬嘛~不過我都好爭取時間, 瞓咗幾個鐘, 由二點瞓到五點, 起身整落飯俾仔仔就出街啦, 自己搭巴士去旺角, 原本我仲諗住自己會早到......點知自己係最遲一個, 真sorry啦!其實旺角區我一向都好少去, 少到認唔到路個種, 所以落車時為咗搵港鐵站, 都兜咗一個大圈~真係好一個旺角路盲.
去到東大門樓下同等我既C小姐仲有I小姐(公司A/C)就一齊上去, 幾位男仕已經係上面等位~雖然我地一早卜咗位, 但因為人太多所以都要等, 不過東大門效率幾高, 真係八點俾到枱我地~坐底就叫野食囉, 叫到一枱都係, 男仔一個爐, 女仔一個爐, 至於手勢, 更係我地高章啲啦~~仲要服侍埋班男仕, 因為東大門唔係自己出去拎, 係由廚房送上, 廚房衛唔衛生唔知, 但比起其他自助韓燒黎講, 感覺好啲, 因為其他自助韓燒要自己拎野食, 好多時啲人會係啲食物面前同朋友講野, 咁啲口水......大家明啦~所以今次都食得好飽, 食完就各散東西囉, 我就返咗屋企, 原本I小姐問我行唔行一陣街吖, 但因為太怕係旺角行街啦, 人多車多, 所以就返歸做"宅女"囉~
跳過星期日, 一
尋日星期二, 上晝照常工作, 下晝去九龍灣聽講咗, 係公司留到一點鐘就搭車出海翠坊買午餐, 之後搭259D出去, 因為未搭過既關係, 所以一早上咗九巴check咗啲路程, 明明九巴網話259D會係屯門泳池做屯門最尾一個站, 之前聽同事L先生講都係, 但尋日架車過咗屯門泳池唔係上公路, 而係去咗市中心, 當時我心諗, 唔係搭錯車吖, 好彩過咗市中心架車就顯示出九龍, 如果真係搭錯車就麻煩囉, 因為出到去早咗既關係, 我就去咗馬莎買野, 發現馬莎啲服務好咗好多, 因為我買既野可以半價多一件, 所以啲SALES見我只拎住一件, 就埋黎同我講可以半價多一件, 但因為我唔想買咁多, 所以買一件就算~之後由德福I期行去建造業議會訓練學院, 好鬼遠吖, 又唔熟路, 好彩自己一早印咗地圖, 去到都係14:40左右, A小姐都未到, 咁就唯有自己入去霸位先, 係等LIFT時遇到一個人, 好熟面口, 咁佢同我打招呼, 我又同佢打招呼, 但又唔記得係邊一個, 上到去見到東涌既SHIRLEY, 我又問佢頭先個個人好熟面口, 但佢都唔知噃, 傾到15:20至開始講咗, 後尾A小姐黎到我又問佢, 個個人係未自己同事, 原來真係噃, 諗諗下好似上次上公司學EXCEL時一齊架, 又係叫SHIRLEY, 就係咁公司三個叫SHIRLEY既同事聚首一堂~之後16:00個講座就完咗啦, A小姐話不如一齊食野啦, 跟住就去咗美心, 大家食下野傾下機, 食到咁上下就閃人囉, 不過好唔好意思吖, 帶住A小姐遊花園, 兜咗個大圈~好彩九龍灣有巴士可以直接去到我屋企樓下, 唔駛再轉車咋~
不過尋日聽講座, 遇到一個最唔想遇見既人, 舊公司既"衰人", 如果係遇到其他舊公司既同事, 我諗我會好開心咁打招呼, 但遇到呢啲只識攪風攪雨同屈人既人, 我真係見到唔想見到吖~